បុប្ផាខ្មៅ

ខ្ញុំបានប្រទះឃើញសៀវភៅកំណាព្យ បុប្ផាខ្មៅ នៅបណ្ណាគារអង្គរដោយ ចៃដន្យ។ ខ្ញុំជឿថាប្រាកដ ជាមានអ្នកស្គាល់សៀវភៅនេះ ព្រោះវាជាសៀវភៅចាស់មួយដែលបានបង្ហាញមុខតាំងពីសម័យ សង្គមរាស្រ្តនិយមមកម្លេះ។

បុប្ផាខ្មៅត្រូវបានបោះពុម្ភជាលើកទីមួយនៅខែវិច្ឆកា ឆ្នាំ១៩៧០ វាជាកំរងអត្ថបទកំណាព្យចំនួន២៦ ដែលសុទ្ឋសឹងតែជាស្នាដៃរបស់លោក គយ សារុន (ខ្ញុំប្រើពាក្យលោក ព្រោះខ្ញុំពុំស្គាល់អំពីឋានៈពិត របស់លោក)។

នៅពេលនេះ ខ្ញុំសូមលើកយកអត្ថបទកំណាព្យមួយដែលខ្ញុំពេញចិត្តជាងគេ មកចែកជូនអ្នកទាំងអស់ គ្នាអានកំសាន្ត និងវាយតំលៃទៅតាមការយល់ឃើញរបស់អ្នក៕

វិលវិញឬអូន?

១
តូចធំ ធំតូច ស្តួចរីកសាយ   ចង្អៀតទូលាយ រួចចង្អៀត
វែងខ្លី ខ្លីវែង រួចខ្លីទៀត   រួចបង្ហាញងៀតអោយច្បាស់ការ ។

២
ពីដើមមនុស្សស្រាតរួចចេះប៉ឹង   រួចប្រឹងដេរស្លៀកបិទកាយា
ស្លៀកពាក់ជុំជិតរឹតអាត្មា   យល់ថាបែបហ្នឹងទើបហៅថាល្អ ។

៣
ឥឡូវយល់ថាវែងលែងសម   តាំងខំវៀលវះបញ្ចេញក
បង្ខើចដល់ភ្លៅនៅបន្ត   ចំហថែមទៀតជូនកំសាន្ត ។

៤
យូរទៅប្រហែលជាគេប៉ឹង   ឬស្រាតទេដឹង?មិនហ៊ានស្មាន!
យ៉ាងណាក៏ដោយអោយតែបាន   តាមដានសម័យថ្មីអោយទាន់៕